Guðni um að jafna greiðslur – Lang mest af okkar tekjum koma karlamegin

Stjórn KSÍ hefur endurskoðað fyrirkomulag á árangurstengdum greiðslum (stigabónus) til leikmanna A landsliðanna vegna leikja í undankeppnum stórmóta. Upphæðir sem greiddar eru til leikmanna fyrir áunnin stig í undankeppnum stórmóta verða þær sömu óháð því hvort lið sé um að ræða.

Hingað til hefur fyrirkomulagið milli A landsliða karla og kvenna verið gerólíkt en eftir breytinguna er fyrirkomulagið orðið eins hjá báðum A landsliðum. Um er að ræða umtalsverða hækkun á stigabónus til leikmanna A landsliðs kvenna. Því má svo bæta við að dagpeningagreiðslur KSÍ til leikmanna vegna þátttöku í verkefnum A landsliða karla og kvenna hafa verið jafn háar í báðum liðum um árabil.

,,Við töldum þetta rétt skref, við töldum þetta rétt skref fyrir íslenska knattspyrnu. Þetta er hvetjandi fyrir stelpurnar og væri jákvætt skref sem við vildum taka, það var einhugur um þetta,“ sagði Guðni Bergsson formaður KSÍ í samtali við 433.is.

Um er að ræða gríðarlega hækkun á árangurstengdum greiðslum sem stelpurnar fá.

,,Hækkunin er umtalsverð, hún er þónokkuð. Það stóð til að hækka greiðslurnar og við ákváðum síðan að taka þetta skref og jafna þær.“

Mikið hefur verið rætt um jafnlaunavottun í samfélaginu og er þetta skref KSÍ í takt við það.

,,Við erum með sterkan tekjugrunn innan KSÍ og við teljum okkur vel þess bær að taka þessa ákvörðun, þetta er hvatning fyrir kvennaboltann. Það eru sóknarfæri í kvennafótbolta, 30 prósent í fótbolta hér á landi eru konur en 70 prósent karlar. Þetta eru jákvæð skilaboð út í samfélagið.“

Lang stærstur hluti af tekjum KSÍ kemur inn í gegnum A-landslið karla.

,,Það er kannski ástæðan fyrir því að það hefur ekki verið samræmi í þessu, tekjur almennt í fótboltanum koma miklu meiri karlamegin. Hvort sem það er aðgangseyrir eða sjónvarpstekjur. Það hefur ekki mikið breyst en þó eitthvað og á leið í rétta átt, lang mest af okkar tekjum og tekjum annara sambanda eru að koma karlamegin. Það er staðreynd.“

,,Við getum haft jákvæð áhrif með þessu gagnvart okkar landsliðskonum, þær leggja hart að sér. Þær verða sumar við vinnutapi með því að vera í landsliðinu.“


desktop