Heimir hefði íhugað að hætta með landsliðið hefði Lagerback verið áfram

Heimir Hallgrímsson landsliðsþjálfari Ísland hefði íhugað það að hætta sem þjálfari liðsins hefði KSÍ framlengt samning Lars Lagerback.

Samningur Heimis við KSÍ var á þá leið að hann og Lars skyldu þjálfa liðið saman fram yfir lokamót EM en að þaðan í frá myndi Heimir stjórna liðinu einn.

Í lok árs 2015 bárust hins vegar fréttir um að KSÍ hefði farið þess á leit við Lars að hann héldi áfram fram til ársins 2018. Það kom Heimi óþægilega á óvart.

„Ég hefði líklega ekki farið aftur með Lars fyrir undankeppni EM árið 2014 nema vegna þessa ákvæðis í samningnum mínum um að ég tæki svo einn við liðinu eftir að mótinu lyki. Að KSÍ skyldi hefja viðræður við Lars um framhald fram yfir EM var því í raun brot á samningi mínum af hálfu KSÍ, því ef þeir semdu við Lars væri minn samningur orðinn marklaus,“ sagði Heimir í ítarlegu viðtali við 433.is og DV sem birtist um helgina

Fannst þér KSÍ og Geir Þorsteinsson, þá formaður KSÍ, fara á bak við þig með þessu?

„Já mér fannst það, auðvitað átti formaðurinn að tala við mig fyrst og bjóða mér breytingu á mínum samningi eða eitthvað annað þess háttar. Ég er ekkert svo viss um að ég hefði verið ánægður í starfi ef ég hefði verið aftur í sömu sporum, ég er bara það metnaðarfullur. Ég var aðstoðarþjálfari í tvö ár, var meðþjálfari í tvö ár og það var markmiðið að vera svo einn þjálfari þar á eftir. Ég veit ekki hvort ég hefði haldið áfram ef KSÍ hefði samið við Lars um að vera lengur. Ekki það að ég hafi ekki viljað vinna með Lars, síður en svo, heldur var það einfaldlega metnaður minn að taka við liðinu einn og mér fannst ég vera tilbúinn til þess.“

Heimir hefur sannað sig sem þjálfari í hæsta gæðaflokki þar sem hann stýrði liðinu í fyrsta sinn á Heimsmeistaramótið í Rússlandi á mánudag með sigri á Kósóvó.

Lestu viðtalið í heild í helgarblaði DV.


desktop