Heimir slökkti í sófasérfræðingum

Ísland er með málin í sínum höndum fyrir tvo síðustu leikina í undankeppni Heimsmeistaramótsins í Rússlandi á næsta ári. Það voru vonbrigði og gleði í leikjunum tveimur sem íslenska liðið lék á laugardag í síðustu viku og nú á þriðjudag. Íslenska liðið heimsótti Finnland í Tampere á laugardag og tapaði 1-0, tapið var óvænt enda átti Ísland að vera talsvert sterkara liðið. Liðið spilaði hins vegar illa og fór illa með nokkur góð færi, margir voru því svartsýnir fyrir heimaleik gegn Úkraínu á Laugardalsvelli á þriðjudag. Það var þó ekki þörf á slíku enda vann Íslenska liðið frábæran 2-0 sigur þar sem dýrasti knattspyrnumaður í sögu Íslands, Gylfi Þór Sigurðsson, skoraði bæði mörkin.

Sigurinn á föstudag kemur íslenska liðinu í góða stöðu fyrir tvo síðustu leikina í október, liðið byrjar á að heimsækja Tyrkland og síðan kemur Kósóvó í heimsókn á Laugardalsvöll. Stig í Tyrklandi og sigur gegn Kósóvó heima myndu að öllum líkindum tryggja íslenska liðinu annað að tveimur efstu sætunum í riðlinum.

Sá besti kláraði Úkraínu
Það er ekki hægt að minnast á leikinn við Úkraínu öðruvísi en að ræða um Gylfa Þór, þennan frábæra knattspyrnumann sem steig upp þegar mest á þurfti. Það er hreint magnað að fylgjast með Gylfa í bláu treyjunni en í síðustu tveimur undankeppnum hefur Gylfi hjálpað liðinu að tryggja sér 18 stig. Gylfi var gjörsamlega magnaður í undankeppni EM 2016 og fann svo gömlu skotskóna aftur í gær. Gylfi hefur skorað 17 mörk og er orðinn þriðji markahæsti leikmaður í sögu Íslands. Það ætti hver einasti ungi knattspyrnuiðkandi að fylgjast með því hvernig Gylfi spilar leikinn, fyrir utan hið augljósa að hann sé með afburða getu í knattspyrnu. Það sem ungir knattspyrnuiðkendur ættu að fylgjast með er vinnusemi og dugnaður Gylfa; leikmaður með svona hæfileika og þennan dugnað í bland mun alltaf ná langt. Gylfi er til í að fórna sér fyrir liðið og það hefur skilað sér í frábærum árangri Íslands.

Heimir þaggaði niður í sófasérfræðingum
Heimir Hallgrímsson, þjálfari liðsins, hefur í þessari undankeppni sannað sig sem þjálfari í fremstu röð. Þegar hann starfaði með Lars Lagerbäck þá fékk sænski þjálfarinn talsvert meira hrós en Heimir. Heimi hefur hins vegar tekist að halda gengi liðsins í sama horfi og hefur þorað að gera breytingar og stíga úr þeim kassa sem Lagerbäck hafði mótað. Svíinn vildi aðeins spila leikkerfið 4-4-2 og hélt sig við það með góðum árangri, Heimir hefur hins vegar undanfarið breytt um kerfi og látið liðið spila 4-5-1 og hefur með því fært Gylfa Þór aðeins framar á völlinn. Kerfið hefur virkað með frábærum árangri gegn Króatíu og Úkraínu sem eru tvö sterkustu lið riðilsins ásamt Íslandi, kerfið virkaði ekki í leiknum gegn Finnlandi en tapið þar er ekki hægt að skrifa á kerfið. Þar áttu flestir leikmenn slakan dag og því erfitt að benda á leikkerfi Heimis til að gagnrýna hann.

Kynslóðaskipti að eiga sér stað
Það hefur verið áhugavert að sjá hvernig Heimir hefur verið að færa ábyrgðina yfir á yngri menn og setja eldri leikmenn á bekkinn. Í sumar ákvað Heimir að setja Hörð Björgvin Magnússon í stöðu vinstri bakvarðar og virðist hann hafa eignað sér þá stöðu núna. Ari Freyr Skúlason hafði í fleiri ár verið fastamaður í stöðunni. Hörður hefur komið sterkur inn í liðið og virðist ekki vera á leið út úr því í bráð. Gegn Úkraínu var svo Kári Árnason settur á bekkinn í fyrsta sinn í fleiri ár, miðvörðurinn hefur reynst íslenska landsliðinu frábærlega og ekki ólíklegt að hann geri það áfram. Sverrir Ingi Ingason tók stöðu hans gegn Úkraínu og kom frábærlega inn, það verður því erfitt fyrir Heimi að setja hann á bekkinn. Sverrir er fæddur árið 1993 og er því framtíðarleikmaður í hjarta varnarinnar hjá Íslandi, hann hefur beðið þolinmóður eftir tækifæri sínu og nýtti það mjög vel.

Einstakir stuðningsmenn
Stuðningsmenn Íslands halda áfram að toppa sig og stemmingin á Laugardalsvelli á þriðjudag var með besta móti, það er að miklu leyti Heimi Hallgrímssyni að þakka hversu öflugur stuðningurinn er í dag. Þegar hann kom inn í þjálfun liðsins fór hann að vinna í því að virkja stuðningsmennina, hann færði þá nær liðinu með því að ræða við þá á leikdegi og fleira í þeim dúr. Með góðum árangri hefur svo kjarninn stækkað og í dag Laugardalsvöllur fullur af stuðningsmönnum en ekki áhorfendum. Það vakti athygli eftir leikinn á þriðjudag þegar Heimir fór að ræða við Tólfuna, hörðustu stuðningsmenn íslenska landsliðsins. Hann vildi þó ekki gefa upp hvað fór á milli manna. „Við eigum sérstakt samband. Það er margt sem við segjum sem fjölmiðlar fá ekki að vita, ég bað alla að slökkva á símanum þegar ég talaði. Það sem var sagt er líklega ekki boðlegt fyrir fjölmiðla.“

Laugardalsvöllur gefur:
Laugardalsvöllur er orðinn eitt mesta vígi í knattspyrnuheiminum en liðið hefur ekki tapað í 15 leikjum í röð á vellinum. Ísland vann í vikunni 2-0 sigur á Úkraínu í undankeppni HM en ljóst er að lið eru byrjuð að óttast það að koma á Laugardalsvöll. Ísland tapaði síðast á heimavelli 7. júní árið 2013 í undankeppni HM 2014. Þá kom Slóvenía í heimsókn og var tapið afar óvænt. Íslenska liðið tapaði aldrei heimaleik í síðustu undankeppni og hefur ekki tapað neinum leik í þessari undankeppni. Ísland á einn heimaleik eftir í undankeppni HM 2018 gegn Kósóvó og gæti farið í gegnum tvær undankeppnir án þess að tapa leik.

Leikirnir:
Ísland – Færeyjar 1-0
Ísland – Albanía 2-1
Ísland – Kýpur 2-0
Ísland – Króatía 0-0
Ísland – Eistland 1-0
Ísland – Tyrkland 3-0
Ísland – Holland 2-0
Ísland – Tékkland 2-1
Ísland – Kasakstan 0-0
Ísland – Lettland 2-2
Ísland – Liechtenstein 4-0
Ísland – Finnland 3-2
Ísland – Tyrkland 2-0
Ísland – Króatía 1-0
Ísland – Úkraína 2-0


desktop