Hópur öfgafemínista virðist hafa áhyggjur af umfjöllun um Gylfa Þór

KÞBAVD sem er hópur öfgafemínista á Íslandi virðist eitthvað hafa áhyggjur af því hvernig fjallað er um Gylfa Þór Sigurðsson leikmann Everton.

Gylfi hefur mikið verið í fréttum síðustu daga eftir félagaskipti sín til Everton.

Everton greiddi metfé fyrir Gylfa sem er dýrasti leikmaður í sögu félagsins. Everton borgaði Swansea 45 milljónir punda til að tryggja sér starfskrafta þessa frábæra leikmanns.

KÞBAVD hefur af þessu áhyggjur og blandar inn í það umræðunni um hver eigi að vera íþróttamaður ársins.

Sú umræða fer alltaf af stað undir lok hvers árs en Gylfi þykir afar líklegur til sigurs í ár enda árið hingað til verið honum gjöfult.

,,Í ljósi þess að lítið hefur frést af líðan og afrekum Gylfa Þórs Sigurðssonar í allan heila dag höfum við ákveðið að hrinda af stað undirskriftasöfnun til að hvetja til þess að hann verði ekki sniðgenginn þegar kemur að vali á íþróttamanni ársins. Getur einhver kall hjálpað okkur? Hvar er best að gera svona söfnun? Kveðja, íslenskar konur. STÖNDUM VÖRÐ UM GYLFA! LÁTUM EKKI ÞAGGA ÞESSA UMRÆÐU!,“
var skrifað á Facebook síðu KÞBAVD í gær.

Mörgum þykir þessi stöðuuppfærsla á Facebook furðuleg enda afrek Gylfa magnað og lítil ástæða til þess að gera lítið úr því að flestra mati.

Um KÞBAVD af heimasíðu samtakanna:
Við erum hópur öfgafemínista sem vill brjóta feðraveldið á bak aftur. Hér ætlum við að birta greinar um hverskyns misrétti sem verður á vegi okkar. Við heitum því að vera róttækasti punktur internetsins og að okkur sé ekkert óviðkomandi.

KÞBAVD er skammstöfun fyrir „Konur þurfa bara að vera duglegri“ en sú setning hefur oft einkennt málflutning karla þegar konur benda á misrétti sem þær verða fyrir.

Meira:
Myndir: Gylfi fékk frábærar móttökur á Goodison Park
Gylfi fagnar því að Breiðablik og FH fái tugi milljóna
Gylfi býst við að vera á bekknum – Verður slegist um föstu leikatriðin
Gylfi Þór: Þú getur ekki ímyndað þér hversu mikil vitleysa er skrifuð
Gylfi Þór um kaupverðið – Set sjálfur mikla pressu á mig
Breytir Everton um nafn á heimavelli sínum? – SoGoodson Park


desktop