Formaður Breiðabliks – Tók á alla að reka Arnar úr starfi

Ólafur Hrafn Ólafsson formaður knattspyrudeildar Breiðabliks hefur sent stuðningsmönnum félagsins bréf.

Bréfið ritar Ólafur í Facebook hóp þar sem stuðningsmenn Breiðabliks eru.

Ólafur segir að kvennalið féagsins sé ljósið í myrkrinu þessa stundina en erfitt er hjá karlaiði félagsins.

Arnar Grétarsson var rekinn úr starfi fyrir rúmri viku og ekki hefur tekist að finna eftirmann hans.

Breiðablik hefur tapað fjórum fyrstu leikjum tímabilsins og er úr leik í bikarnum.

Hér að neðan má lesa bréf Ólafs til stuðningsmanna.

Bréf Ólafs á Facebook síðu stuðningsmanna Breiðabliks:
Sælir félagar
Það hefur ekki alltaf verið auðvelt að vera Bliki síðustu vikur, ljósið í myrkrinu hefur verið gengi stelpnanna okkar og Steina í meistaraflokki kvenna. Gengi karlaliðsins hefur verið undir væntingum og í síðustu viku ákvað stjórnin að skipta um manninn í brúnni. Sú ákvörðun var gríðarlega erfið og tók á alla sem komu að henni. En í ljósi aðstæðna var það mat stjórnarinnar að því miður hafi það verið óhjákvæmilegt og ekkert annað í stöðunni. Kannski voru það mistök hjá okkur að vera ekki tilbúin með eftirmann en af virðingu við Adda og félagið fannst okkur ekki koma til greina að fara á bak við hann og byrja einhverja leit meðan hann var enn í starfi hjá félaginu. Leit að nýjum þjálfara stendur yfir og leggjum við okkur fram um að gera það eins faglega og vel eins og kostur er og munum því taka okkur þann tíma sem þarf til að klára það mál. Ég á samt von á því að fljótlega verði hægt að tilkynna hver eða hverjir stýri liðinu næstu misseri.

Á sunnudaginn er næsti leikur og tækifæri til að rífa sig af stað. Við förum í Víkina og mætum Víking Reykjavík. Við vitum öll að það býr mikið í liðinu, við vitum líka hvað stuðningur áhorfenda er mikilvægur og strákunum okkar veitir svo sannarlega ekki af honum! Ég vil því biðla til ykkar að mæta á völlinn og hvetja liðið okkar áfram því stuðningur okkar félagsmanna skiptir sjaldan meira máli en á svona stundum.

Eins og við vitum öll skiptir hugarfar í íþróttum miklu máli, innan vallar sem utan. Myndbandið sem Hilmar Jökull birti hér í gær er frábært dæmi um það! Snúum nú bökum saman því eins og orðatiltækið segir, sameinaðir stöndum ver sundraðir föllum vér!

Áfram Breiðablik!


[dc_social_feed id="124"]
desktop