Milos hættur hjá Víkingi Reykjavík

Milos Milojevic er hættur sem þjálfari Víkings R. en þetta kemur fram í tilkynningu félagsins í kvöld.

Víkingar byrjuðu Íslandsmótið í sumar mjög vel en liðið vann KR í fyrstu umferð en tapaði svo gegn Grindavík og ÍBV.

Milos var þjálfari Víkings gegn Haukum fyrr í þessari viku í Borgunarbikarnum þar sem Víkingar höfðu betur.

Það reyndist síðasti leikur Milos með liðið og munu þeir Dragan Kazic og Hajrudin Cardakljija taka við liðinu tímabundið.

Tilkynning Víkings R:
Samkomulag hefur orðið á milli Knattspyrnudeildar Víkings og Milos Milojevic að hann láti af störfum sem þjálfari Pepsi deildar liðs félagsins frá og með deginum í dag.

Ástæða starfslokanna er skoðanaágreiningur sem reyndist óyfirstíganlegur.

Milos tók við sem aðalþjálfari sumarið 2015 af Ólafi Þórðarsyni en hann hefur unnið samfleytt hjá félaginu frá árinu 2009.
Knattspyrnudeild Víkings þakkar honum samstarfið og óskar honum velfarnaðar en Milos á mikinn þátt í uppbyggingu félagsins síðustu ár.

Dragan Kazic og Hajrudin Cardaklija munu stýra liðinu tímabundið.


desktop